يوميات الحمار السياسي

يكتبها نيابة عنه: محمد بلغازي 

لانني أفضل أن أكون حمارا صحفيا على أن أكون صحفيا حمارا فانني أحترم حماريتي و مواقفي وأبقى وفيا لمبادئي و قناعاتي و أنا أطرح يومياتي الا أن ما تعرفه الشوارع هذه الأيام دفعني إلى أن أنزل إلى الشارع، لا لأهرنط أو أركل، وإنما لإجراء حوارات مع بعض أطراف الحراك، الذين يُهِرنط بعضهم ويركل البعض الآخر.. لأنني أيضًا لا أثق في البشر أيًّا كان توجّهه، فإنني سأحاول الاقتراب من (سطافيط) لإجراء حوار معها.

الحمار:
ـ أش واقع؟.. أشطاري؟.. أش هاد الحايحة فالشارع؟

سطافيط:

سير بدل الساعة باخرى .. الوقت خايبة.

الحمار:

أشنو كاين ؟.. ما لكوم كثار فالشارع؟

سطافيط:

واش تمشي فحالك و لا نقول ليهوم يطلعوك؟

الحمار:

قبل ما نطلع .. بغيت نعرف علاش هاد الشدان؟

سطافيط:

هادو شي دراري سخن عليهوم راسهوم و كانعاودو ليهوم التربية.

الحمار:

واااايلي.. كاتعودو التربية بالعنف، الدراري ماهازين لا سيوف لا زراوط لا حجر..

سطافيط:

فينا هو العنف؟ .. واش شفتي شي زرواطة

الحمار:

المهم علاش هاد الصداع كامل الدراري باغيين الصحة و التعليم .. فينا هو المشكيل؟

سطافيط:

المشكل هو أنهم مدفوعين..

الحمار:

كيفاش مدفوعين، … هادي مطالب مشروعة حتى الحيوانات فالغابة كاتطالب بها ..

سطافيط:

واااايلي ..(تضحك) دابا أنت واخا حمار تطالب بالصحة و التعليم؟

الحمار:

سي الحمار الله يخليك .. شوية ديال الاحترام و زايدون أنا حمار صحفي .. كاندير خدمتي.

سطافيط:

و الله ما كذبتي.. كولكوم وليتو صحفيين خربقتوها ودابا خليني حتى أنا نديرخدمتي

الحمار:

انت بعدا راكي عمرتي بالدراري .. ما بقاليك فين تزيدي..

سطافيط:

ماتخافش.. بحالي بزاف .. موجود المركوب و فابور..

الحمار:

و دابا هاد الدراري لي كاتشدوهم واش غادي يتحاكمو؟ واشنو هي التهمة

سطافيط:

آودي الله يهديك .. واليني انت حمار بصح ماكاين لامحاكمة لاوالو .. غادي نبعدوهوم من هنا و نطلقوهوم يمشيو لديورهوم

الحمار:

و علاش شدينهوم من الأول ؟

سطافيط:

لابد من الغربال .. يمكن يكونو مدسوسين شي وحدين مشبوهين .. بغاو يقربلوها.

الحمار:

وبزاااااف على الغربال .. والعالم كلو شاف هادشي .. وخاصة العديان لي كايتسناو غير الفرصة.

سطافيط:

سير .. سير بعد مني .. هاهوما جايبين شي وحدين خرين..

الحمار: (يقترب من طفل)

آشنو كادير هنا

الطفل:

الشعب يريد اسقاط الفساد ..

عون أمني:

سير اولدي فحالك الله يرضي عليك.

الطفل:

ماغاديش…

الحمار:

حتى لهنا..  صافي.. باراكا .. نرجع للكوري ديالي .. واكل شارب ناعس حتى هاد الصحافة نعطيها التيساع..

سطافيط:

الحمار مايبقى غير حمار…