ⴰⵎⵉⵏⴰ ⴱⵓⵄⵢⵢⴰⵛ, ⵜⵎⵎⴰⵇⵇⴰⵔ ⵜⵏⵙⵙⵉⵅⴼⵜ ⵏ ⵓⵥⵟⵟⴰ ⴰⴼⵔⵉⵇⵉ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵉⵏⴳⴳⵯⴰ ⵏⵏⵙ ⵉⴼⵔⵉⵇⵉⵢⵏ ⴳ ⴱⵔⴰⵢⴰ, ⵜⴰⵎⴰⵥⵓⵏⵜ ⵏ ⵢⵉⵅⴼ ⴰⵣⴳⵣⴰⵡ, ⴳ ⵡⵉⵙⵙ ⴽⵕⴰⴹ ⵉⴱⵔⴳⵔⴰⵡⵏ ⵏ ⵓⵥⵟⵟⴰ, ⴷⴼⴼⵉⵔ ⵎⵕⵕⴰⴽⵛ ⴷ ⴽⴰⵢⴱ ⵜⴰⵡⵏ
ⵏⴳⵔ ⵙⵏⴰⵜ ⵜⵙⴳⴳⵯⵉⵏ ⵜⵉⵟⵍⴰⵙⵉⵢⵉⵏ, ⵎⵓⵏⵏ ⵉⵎⴰⵍⴰⵙⵙ ⴰⴷ ⵉⵏⵎⵣⴰⵖⵏ/ⵜⵉⵏⵎⵣⴰⵖⵉⵏ ⴷ ⵉⵏⵙⵙⵉⵅⴼⵏ ⵏ ⵜⵎⵔⵙⴰⵍ ⴷ ⵉⵏⴳⵎⴰⵎⵏ ⵉⵣⵔⴼⴰⵏⵏ ⵙⴳ ⵜⵎⵏⴰⴹⵉⵏ ⵜⵉⵙⴳⴰⵡⴰⵏⵉⵏ ⵙ ⵙⵎⵎⵓⵙⵜ, ⴳ ⵜⵎⴰⵥⵓⵏⵜ ⵏ ⵡⴰⵔⵅⴰⴱⵉⵍ ⵏ ⵢⵉⵅⴼ ⴰⵣⴳⵣⴰⵡ ⴳ ⴱⵔⴰⵢⴰ, ⴰⵙⵉⵏ ⴷⵉⴷⵙⵏ ⵜⴰⴱⵔⴰⵜ ⵉⴼⴰⵡⵏ : “ⵓⵔ ⵉⵍⵍⵉ ⵓⴷⵖⴰⵔ ⵉ ⵓⵙⵔⴼⵓⴼⵏ ⴳ ⵢⵉⵎⴰⵍ ⵏ ⵉⴼⵔⵉⵇⵢⴰ ⴷ ⵜⵉⵍⴰⵡⵜ ⵏⵏⵙ”.
“ⴰⵎⵢⴰ ⵏ ⵓⵙⵔⴼⵓⴼⵏ ⵓⵔ ⵉⴳⵉ ⵜⴰⵎⴰⵜⴰⵔⵜ, ⵎⴰⵛⴰ ⴷ ⴰⵡⵜⵜⴰⵙ ⵓⵎⵀⵉⵍ ⵏⵡⴰⵜⵜⵙ ⴰⴷ ⵜ ⵏⵍⴽⵎ, ⵉⴱⴷⴷ ⵅⴼ ⵉⵎⴰⵙⵙⵏ ⵏ ⵡⴰⵔⴰⵢ ⴷ ⵜⵙⵓⵙⵖⵜ ⴷ ⵓⵙⵙⵎⵔⵙ ⵏ ⵜⴻⵜⵉⴽⵏⵓⵍⵓⵊⵉⵜ ⵙ ⵜⵎⵙⵜⴳⴳⴰⵔⵜ”, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⵙⵙⵉⵅⴼⵜ ⵏ ⵓⵥⵟⵟⴰ ⴰⴼⵔⵉⵇⵉ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⵏⵏⴰ ⵎⵉ ⵉⵙⵏⵓⴱⴳ ⵍⵎⵖⵔⵉⴱ ⴰⵙⵖⵉⵎ ⵏ ⵜⵏⴼⵍⵓⵙⵜ ⵏⵏⵙ ⵜⴰⵎⵖⵍⴰⵍⵜ.
ⴳ ⵓⵣⵎⵣ ⵏ ⵙⵉⵏ ⵡⵓⵙⵙⴰⵏ, ⵔⴰⴷ ⵜⵎⵎⴰⵇⵇⴰⵔ ⴱⵓⵄⵢⵢⴰⵛ ⴷ ⵉⵏⴳⴳⵯⴰ ⵏⵏⵙ ⵉⴼⵔⵉⵇⵉⵢⵏ ⴰⴼⴰⴷ ⴰⴷ ⵣⵣⵉⴳⵣ ⵙ ⴷⴰⵜ ⵖⵔ ⴰⵎⵢⴰ (ⵥⵉⵕⵓ) ⵏ ⵓⵙⵔⴼⵓⴼⵏ ⴳ ⵉⴼⵔⵉⵇⵢⴰ, ⴳ ⵡⵉⵙⵙ ⴽⵕⴰⴹ ⵉⵏⵎⵓⵇⵇⴰⵔⵏ ⵉⵙⴳⵯⵙⴰⵏⵏ ⵏ ⵓⵥⵟⵟⴰ ⴰⴼⵔⵉⵇⵉ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⴷⴼⴼⵉⵔ ⵎⵕⵕⴰⴽⵛ (2023) ⴷ ⴽⴰⵢⴱ ⵜⴰⵡⵏ (2024). ⵉⵜⵜⵓⵙⵏⵎⴰⵍⴰ ⵓⴱⵔⴳⵔⴰⵡ ⵏ ⵓⵙⴳⴳⵯⴰⵙ ⴰⴷ (25-26 ⵢⵓⵏⵢⵓ 2025) ⴷⴷⴰⵡ ⵏ ⵓⵣⵡⵍ ⴰⵜⵔⴰⵔ: “ⵜⴰⵜⵉⴽⵏⵓⵍⵓⵊⵉⵜ ⴷ ⵡⴰⵔⴰⵢ ⵙⴳ ⵓⵙⵔⴼⵓⴼⵏ”, ⵙ ⵜⴷⵔⴰⵡⵜ ⵏ ⵉⵏⵙⵙⵉⵅⴼⵏ ⴷ ⵉⴳⵏⵙⴰⵙ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴳ ⵉⴼⵔⵉⵇⵢⴰ, ⴷ ⵉⵎⵓⵣⴰⵢⵏ ⵉⴼⵔⵉⵇⵉⵢⵏ ⴷ ⵉⴳⵔⴰⵖⵍⴰⵏⵏ, ⴷ ⵜⵎⴰⴷⴷⴰⵙⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ.
ⴰⵙⵏⵎⴰⵍⴰ ⵏ ⵓⴱⵔⴳⵔⴰⵡ ⵏⵏⵖ ⴰⵙⴳⴳⵯⴰⵙ ⴰⴷ “ⵜⴰⵙⵓⵔⵉⴼⵜ ⵢⴰⴹⵏⵉⵏ ⴳ ⵓⵡⴰⵜⵜⵙ ⵏⵏⵖ ⵙ ⵜⴷⵔⴰⵡⵜ ⴳ ⵓⵚⴽⵓ ⵉⵛⵛⴰⵔⵏ ⵏ ⵢⵉⵎⴰⵍ ⴳ ⵜⴳⴳⵓⵜ ⵜⵏⴼⴳⴰⵏⵜ ⴳ ⵉⴼⵔⵉⵇⵢⴰ”, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ, ⵏⵏⴰ ⵉⵕⵥⵎⵏ ⵜⵉⵖⵉⵎⵉⵜ ⵎⵉ ⵢⴰⵜⵜⵓⵢ ⵓⵙⵡⵉⵔ ⴰⴽⴷ ⵜⵎⴰⵡⵙⴰⵙⵜ ⵏ ⵜⵣⵔⴼⵜ ⵏ ⵢⵉⵅⴼ ⴰⵣⴳⵣⴰⵡ ⴷ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⴳⴷⵓⴷⵏ ⴷ ⵉⴳⵏⵙⴰⵙⵏ ⵏ ⵜⵎⵜⵜⴰ ⵉⵎⵓⵏⵏ ⴷ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵏ ⵓⵙⴳⴷⵍ ⵏ ⵓⵙⵔⴼⵓⴼⵏ ⴷ ⵜⵏⵙⵙⵉⵅⴼⵜ ⵏ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⴱⵔⴰⵢⴰ ⴷ ⵓⵏⵙⵙⵉⵅⴼ ⵏ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⵙⴳ ⵜⴰⵜⵉⴽⵏⵓⵍⵓⵊⵉⵜ ⴷ ⵓⴷⵔⵉⵣ ⵏⵏⵙ ⵅⴼ ⵡⴰⵔⴰⵢ ⵖⵔ ⵓⴱⵟⵟⵓ ⵏ ⵜⵉⵔⵎⵉⵜⵉⵏ ⵜⵉⵏⴰⵎⵓⵔⵉⵏ ⵙ ⵓⵙⵙⵎⵔⵙ ⵏ ⵜⴰⵜⵉⴽⵏⵓⵍⵓⵊⵉⵜ ⴳ ⵉⵔⵣⴰⴼⵏ ⵏ ⵡⴰⵔⴰⵢ ⴷ ⵓⵙⵎⵓⵜⵜⴳ ⵏ ⵜⴰⵏⴰⴹⵉⵏ, ⵙⴳ ⵓⵙⴷⵓⵙ ⵏ ⵜⵥⴹⴰⵕⵉⵏ ⵜⵓⵎⵀⵉⵍⵉⵏ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵙ ⵉⴼⵙⵙⴰⵢⵏ ⵉⵎⵓⵟⵟⵓⵏⵏ ⵖⵔ ⵜⵎⵏⵜⵉⵍⵉⵏ ⵜⵉⵖⴰⵔⴰⵏⵉⵏ ⴷ ⵜⵓⵍⴳⵉⵏⵉⵏ ⵉⵥⵍⵉⵏ ⵙ ⵓⴼⵔⴰⴳ ⵏ ⵓⵎⵍⴰⵏ ⴷ ⵜⵓⵙⵍⵉⴳⵜ ⵏ ⵓⴼⵔⵉⴷⵏ.… ⵉⵙⵏⵜⴰⵍ ⵉⴷⵙⵍⴰⵏⵏ ⵏⵏⵉ ⵔⴰⴷ ⵜⵏⵜ ⵏⴰⵡⵍⵜ ⵜⵡⵓⵔⵉⵡⵉⵏ ⵏ ⵓⴱⵔⴳⵔⴰⵡ ⵏⵏⴰ ⵖ ⵔⴰⴷ ⵜⵜⵓⵙⵏⵎⴰⵍⴰⵏ ⵉⵏⵎⵓⵇⵇⴰⵔⵏ ⴷ ⵉⴳⵔⴰⵡⵏ ⵉⵎⵔⵙⴰⵍⵏ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵓⵥⵟⵟⴰ ⴰⴼⵔⵉⵇⵉ ⴷ ⵜⵙⵇⵇⵉⵎⵜ ⵏ ⵓⵜⵓⵢ ⵅⴼⵙ.
ⴷⴼⴼⵉⵔ ⵎⵕⵕⴰⴽⵛ ⴰⴷⵙⵍⴰⵏ, ⴷ ⴽⴰⵢⴱ ⵜⴰⵡⵏ ⵏⵏⴰ ⵉⵙⴷⵓⵙⵏ ⵜⴰⵙⵉⵍⴰ ⵏ ⵓⵚⴽⵓ, ⵉⵣⴷⵉ ⵓⴱⵔⴳⵔⴰⵡ ⵏ “ⴱⵔⴰⵢⴰ” ⴰⵚⴽⵓ ⴰⵎⵔⵙⴰⵍ ⴷ ⵓⵙⵡⵓⵔⵉ ⵖⵔ ⵓⵍⴽⴰⵎ ⵙ ⵉⵥⵕⵉ ⴰⴼⵔⵉⵇⵉ ⴰⵖⵣⵓⵔⴰⵏ ⴷ ⵉⵕⵡⴰⵏ ⵉ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⵉⵙⵙⵏⵜⵉⵏ ⴳ ⵜⵖⵔⵎⵜ ⵜⴰⵣⴳⴳⵯⴰⵖⵜ ⵙ ⵜⵙⵏⵜⴰⵢⵜ ⵏ ⵜⵎⵔⵙⴰⵍ ⵏ ⵍⵎⵖⵔⵉⴱ ⴷ ⵉⴼⵔⵉⵇⵢⴰ ⵏ ⵉⴼⴼⵓⵙ. ⴰⵙⵔⵙ ⵢⴰⴹⵏⵉⵏ ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⴷ ⵓⵙⴷⵓⵙ ⵏ ⵓⵣⴷⴰⵢ ⵏⴳⵔ ⵉⵎⴰⵙⵙⵏ ⵉⵏⴰⵎⵓⵔⵏ ⴳ ⵜⵎⵏⵥⴰⵡⵜ ⵉ ⵓⵎⵢⴰ (ⵥⵉⵕⵓ) ⵏ ⵓⵙⵔⴼⵓⴼⵏ ⴳ ⵉⴼⵔⵉⵇⵢⴰ.
ⵅⴼ ⵉⴳⴳⵉ ⵏ ⵜⵡⵓⵔⵉⵡⵉⵏ ⵏ ⵓⴱⵔⴳⵔⴰⵡ, ⵔⴰⴷ ⵉⵖⵜⵙ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵎⵓⵏⵏ ⴳ ⵢⵉⵅⴼ ⴰⵣⴳⵣⴰⵡ ⴰⵏⴰⴳⵔⴰⵡ ⵏⵏⵙ ⴰⴳⵯⵏⵙⴰⵏ ⴷ ⵜⵎⴰⴳⵉⵜ ⵏⵏⵙ ⵜⵉⵎⵉⵥⵉⵕⵜ, ⴷ ⵓⵙⵜⴰⵢ ⵏ ⵓⴳⵏⵙⴰⵙ ⵅⴼ ⵜⵎⵏⴰⴹⵜ ⵏ ⵉⴼⵔⵉⵇⵢⴰ ⵏ ⵓⴳⵎⵎⵓⴹ ⴳ ⵓⴳⵏⵙⵓ ⵏ ⵓⵥⵟⵟⴰ ⴷ ⵓⵍⵖⵓ ⵅⴼ ⵓⵡⴰⵏⴽ ⴰⵎⵙⵏⵓⴱⴳ ⵏ ⵓⴱⵔⴳⵔⴰⵡ ⵡⵉⵙⵙ ⴽⴽⵓⵥ.
ⵉ ⵓⵙⵙⴽⵜⵉ, ⴰⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⵎⵉ ⵜⵏⴰⵔⴰ ⵜⵏⵙⵙⵉⵅⴼⵜ ⵏⵏⵙ ⴰⵥⵟⵟⴰ ⴰⴼⵔⵉⵇⵉ, ⵉⵜⵜⵓⵙⵜⴰⵢ ⵙ ⵜⵖⵜⴰⵙⵜ ⵏ ⵓⴳⵔⴰⵡ ⴰⵎⴰⵜⴰⵢ ⵏⵏⵉ ⵉⴳⴰⵏ ⵜⵉⵎⵔⵙⵍⵜ ⵜⴰⵎⵙⵏⵓⴱⴳⵜ ⵏ ⵜⵏⴼⵍⵓⵙⵜ ⵜⴰⵎⵖⵍⴰⵍⵜ ⵏ ⵓⵥⵟⵟⴰ ⴰⴼⵔⵉⵇⵉ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ. ⵉⵜⵜⵓⵙⵔⵙ ⵓⵥⵟⵟⴰ ⴰⴷ ⵙ ⵓⵎⵙⴰⵙⴰ ⴷ “ⵓⵍⵖⵓ ⵏ ⵎⵕⵕⴰⴽⵛ” ⴰⵎⵙⵔⵓⵙ, ⵏⵏⴰ ⵉⵜⵜⵓⵙⵖⵣⵏⵏ ⴳ ⵉⴼⵔⵉⵇⵢⴰ ⵏ ⵉⴼⴼⵓⵙ, ⵉⴷⴷⵖ ⵉⴳⴰ ⵜⴰⴷⴰⵙⵉⵍⵜ ⵜⴰⵎⵙⵓⵖⵍⵜ ⵉ ⵜⵎⵢⴰⴷⴰⵙⵜ ⵜⴰⴼⵔⵉⵇⵉⵜ ⵜⴰⴳⵔⴰⵡⴰⵏⵜ ⴷ ⵉⵥⵕⵉ ⴰⵎⵏⵥⴰⵡ ⵉⵙⵎⴷⵏ ⵉ ⵡⴰⵔⴰⵢ ⵙⴳ ⵓⵙⵔⴼⵓⴼⵏ.
“ⵓⵔ ⵜⵙⵖⴰⵡⵙⴰ ⵉⴼⵔⵉⵇⵢⴰ ⴰⴷ ⵜⵙⵎⵓⵜⵜⵍ ⵢⴰⵏ, ⵎⴰⵛⴰ ⵜⵙⵖⴰⵡⵙⴰ ⴰⴷ ⵜⵙⵍⵍⵡⵉ ⵉⴼⵙⵙⴰⵢⵏ ⵏⵏⵙ ⵉⵥⵍⵉⵏ”. ⴰⴷ ⵜⵙⵎⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ… ⵜⴰⵙⵏⵜⴰⵢⵜ ⵏⵏⵖ ⴷ ⵜⴰⴼⵔⵉⵇⵉⵜ… ⵙⴳ ⵉⴼⵔⵉⵇⵢⴰ ⵉ ⵉⴼⵔⵉⵇⵢⴰ… ⵙ ⵉⴼⴰⵙⵙⵏ ⵉⴼⵔⵉⵇⵉⵢⵏ ⵉ ⵉⴼⵔⵉⵇⵉⵢⵏ ⴰⴽⴽⵯ.
ⵅⴼ ⵉⴳⴳⵉ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴳ ⵍⵎⵖⵔⵉⴱ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵏⴳⴳⵯⴰ ⵏⵏⵙ ⴳ ⵢⵉⵅⴼ ⴰⵣⴳⵣⴰⵡ, ⴷⵔⵓⵏ ⴳ ⵓⵙⵔⵙ ⵡⵉⵙⵙ ⴽⵕⴰⴹ ⵏ ⵓⵥⵟⵟⴰ ⴰⴼⵔⵉⵇⵉ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⵉⵎⴰⵙⵙⵏ ⵉⵏⴰⵎⵓⵔⵏ ⵙⴳ ⵙⵙⵉⵏⵉⴳⴰⵍ ⴷ ⵉⴼⵔⵉⵇⵢⴰ ⵏ ⵉⴼⴼⵓⵙ ⴷ ⵏⵏⵉⵊⵉⵔ ⴷ ⵍⴱⵉⵏⵉⵏ ⴷ ⴱⵓⵔⴽⵉⵏⴰ ⴼⴰⵙⵓ ⴷ ⵟⵟⵓⴳⵓ ⴷ ⵜⵓⵏⵙ ⴷ ⵔⵡⴰⵏⴷⴰ ⴷ ⵎⴰⴷⵖⴰⵛⵇⴰⵔ ⴷ ⵎⴰⵍⵉ ⴷ ⵎⵓⵕⵉⵟⴰⵏⵢⴰ ⴷ ⵎⵓⵣⴰⵎⴱⵉⵇ ⴷ ⵏⵉⵊⵉⵔⵢⴰ, ⴷ ⴰⵡⴷ ⵜⴰⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ (ACHPR) ⵉⴹⴼⵕⵏ ⵉ ⵜⴰⵎⵓⵏⵜ ⵜⴰⴼⵔⵉⵇⵉⵜ, ⴷ ⵜⵙⵇⵇⵉⵎⵜ (ⵜⴰⵏⵎⵜⵜⴰⵏⵜ) ⵜⴰⵢⵢⴰⵡⵜ ⵏ ⵓⵙⴳⴷⵍ ⵏ ⵓⵙⵔⴼⵓⴼⵏ (SPT) ⴷ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵓⵙⴳⴷⵍ ⵏ ⵓⵙⵔⴼⵓⴼⵏ (APT) ⴷ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (NANHRI) ⴷ ⵜⵎⴰⴷⴷⴰⵙⵜ ⴷⵉⴳⵏⵉⵜⵉ (Dignity).
